卷福和他的朋友們 (已結業)

寂寞難耐的小家碧玉，除左個名特別之外，個賣相都相當之特別，豆腐嘅外層微微焦脆，其中一面綠綠地色嘅仲充滿紫菜嘅香味添，唔好以為啲豆腐經過咁樣烹調之後就無哂豆味啊，佢粒粒都仲保持著黃豆嘅香味，啲香菇都好正，呢一碟俾我哋極速掃哂，嚟呢度一定要試呢碟豆腐啊。雙子座的老司機 - 椒麻蔥油雞，有少少似口水雞，特別鍾意佢將個椒麻辣汁分開上，咁食唔到辣嘅婆婆都可以淨係食啲雞啦，橫掂佢分開上，我就是第一舊唔點汁嘅先，未點汁之前舊雞嘅雞味香濃，點咗之後就勁香椒麻辣味，一雞兩食，爽。蜀地飯妞 - 雞米牙菜，就咁睇個賣相有啲似泰國嘢嗰個生菜包，不過呢度就多咗啲雪菜同青椒，用咗雞肉嚟炒就唔會好似用咗豬肉咁咁多肥肉，由於都落咗少少指天椒落去炒，呢碟嘅辣度完全滿足到我，餸哂啲生菜之後仲可以剩低少少嚟餸飯添。你沒吃過我的豆腐 - 麻婆豆腐，呢間餐廳啲餸菜嘅名改得特別生鬼過人，麻婆豆腐味道正宗，豆腐幾嫩滑，完全無話俾個汁遮蓋哂佢本身黃豆嘅香味，我覺得咁樣就係一個成功嘅麻婆豆腐喇，肉碎中只係夾雜咗好少嘅肥肉，啱哂我呢啲怕肥嘅妹豬，我鍾意食辣就食埋佢啲辣椒，食到大汗疊細汗，分外過癮。