can‧teen (已結業)

今日放假，中午落街食嘢醫肚。因為原本想去個間茶餐廳無位，又唔想行咁遠，所以去隔兩個舖位嘅美心Can-teen。見到餐牌上面有個「MX去骨海南雞」，跟油飯、冬瓜湯同柚子醋沙律，$49少少貴不過望落幾吸引（個人肚餓個腦就運作唔到，完全忘記咗「圖片只供參考」）。雖然有諗過$37食個燒味雙拼飯可以慳十幾蚊喎！不過自己貪新鮮又諗住燒味飯無跟餐飲海南雞飯有個湯噃～ 結果中伏。首先雞無雞味、油飯唔香已經預咗，見到d雞碎濕濕已經扣分，最震撼係個柚子醋沙律⋯⋯ 呢堆咪係出去打邊爐任食用嚟墊肥牛雞件個堆耶菜？你咪以為加咗柚子醋我就唔認得你喎！所謂沙律其實只係一堆生耶菜絲加汁，hea得你吖，我寧願你俾幾條白烚菜心好過。D耶菜咁生冷，飲啖冬瓜湯啦⋯⋯咦，乜同我去茶記食火腿湯通個湯一樣味嘅，即係雞粉水。$49唔係俾唔起，不過真係唔值囉！仲要加$9可以轉雞脾？No way!!一年多前係呢間 Can-teen食過出血水嘅切雞之後，我已經好少嚟呢度食嘢。我諗我以後都唔會再幫趁佢。