舌丼

营业中

休息中

餐廳主要有兩類套餐：鐵板系列，丼飯套餐。因為嚟係食牛舌，兼且只係鐵板先有牛舌芯，所以毫無怨念揀鐵板系列。鐵板系列：牛舌芯拼牛舌尖拼大啡菇（$98）醬汁有日式牛扒汁、和風鹽蔥汁、風味酸辣汁（激辣），見到激辣有啲驚，所以都係要咗牛扒汁同鹽蔥汁算了。套餐包沙律、湯、漬物、飯、飲品，要咗兩個套餐。一個紫菜白飯套餐（+$28），另一個紅酒汁燴牛舌根飯套餐（+$33）。大約十分鐘，兩份餐一齊上枱。鐵板上有一條牛舌芯、三片牛舌尖、一個大啡菇，大量洋蔥墊底，面頭有蒜蓉。牛舌芯約四吋長，厚身，外層表面洒上黑椒調味，咬落十分彈牙，中間仍有少許粉嫩，淋上少許牛扒汁提味。牛舌尖係先煮腍再煎香表面，所以咬落十分軟嫩，表面同樣洒上黑椒調味，加埋蒜蓉增加味道層次。大啡菇味道正常，煮得唔乾仍鎖住水份，又係洒上黑椒調味。紅酒汁燴牛舌根飯，味濃，牛舌根切粒煮得好腍，味道可以。沙律清爽；湯偏清淡；漬物酸蘿蔔開胃；飲品係罐裝。整體味道不錯，但鐵板上三款食材都洒上黑椒，而且都幾重手，所以食落辣味過多，我覺得可以減一半嘅黑椒份量。PS：全日不收加一服務費。