樂園魚旦專家 (海達街市) (已搬遷) 新店位置

天氣凍凍地，又想食下牛腩麵，黎左呢間新開嘅係樂園魚旦專家，位於海達邨街市入面，裝修亦都好新好靚。嗌左金牌牛三寶$52，要幼麵，加$8要左杯熱奶茶。牛三寶分別有牛腩、牛筋、牛肚，牛腩食落去少少脂肪，半肥瘦咁，咬落去啲肉好冧，而且肉汁非常多。牛筋亦好有𡁻口好好咬，好彈牙，都有4十條牛筋左右，而牛肚都好厚好大舊，食落去充滿牛味。而幼麵方面，有少少梘水味，食唔到梘水味嘅朋友要留意一下啦，個人覺得好好味！餐廳都好貼心，佢會將湯底同麵分開上，驚啲麵浸太冧影響麵嘅質感。另外，仲嗌左個雲吞麵$32，加$8壹品豆漿，都係要幼麵，total有4粒雲吞，每粒都好飽滿，食落去好滿足，而且入面包左好多蝦肉，非常唔客氣！飲品方面，熱奶茶飲落去好順口，茶膽味非常充足，而奶嘅份量亦溝得岩岩好，恰到好處，完全可以將奶茶嘅精華散發出黎！估唔到奶茶黎講做得咁出色！！豆漿就支裝黎，正正常常，飲得過的。