OPPA韓國燒肉店 (已結業)

依間名為OPPA嘅韓燒店我早就聽過朋友介紹啦，試過嘅朋友都讚依間店性比價高，今日終於有朋友陪我食一次啦。一入餐廳已經食慾大增，係我期待已久嘅韓燒味啊。我地就揀咗江南海鮮烤肉放題套餐，滿足晒我又想食海鮮又想食牛嘅願望。首先餐廳嘅裝潢都非常有心思，牆上滿滿都係好有特色又精緻嘅油畫，而且韓燒黎講依間都算幾乾淨，枱面清得幾乾淨，唔會沾到成手油，一坐底職員就放低前菜，有泡菜、芽菜同海帶，而且會預先煮泡菜蛋卷。隨即職員就放低一盤放有唔同部位嘅牛肉拼盤同生菜，而且明確地寫上牛肉屬於咩部位，非常貼心。真係會令人一見到就心心眼，因為各部位嘅牛肉脂肪分佈都好平均。我就覺得A4黑毛和牛肩胛同三角腩最出色。做到入口即溶但又有好濃郁嘅牛味。而海鮮頭盆都不容忽視，仲兩隻大蝦、大扇貝同鮑魚仔。大蝦非常新鮮爽口啊。除咗海鮮同牛肉，又點可以唔試埋其他一樣可以任叫嘅小食呢，炸雞味道唔錯，即叫即炸。而且仲有石頭鍋飯可以叫，份量都唔少，而且就算係石頭鍋飯上配嘅牛肉都一樣出色啊，肉質嫩滑又入味。最後仲可以每人有一份雪糕，竟然有開心果味揀，任飲嘅飲品種類都好多，實在令人太滿足啦。人均只需$402就可以食到咁多野，果然性比價高啊。