泰邊爐 (已結業)

之前上網見過呢間餐廳， 已經好想事，今日終於有機會同一班同學去食。我覺得呢間餐廳嘅賣點就係佢嘅湯底，湯底的確幾好食，我嗰日試咗椰子雞同埋咖喱湯底，齋聞個湯底已經覺得好香，一睇就知落足材料。將啲肉放入去滾，啲肉已經好夠味，唔使再點豉油。不過我個人食得比較淡口，覺得個湯底越滾越鹹，所以我建議當啲湯底越滾嘅少時，餐廳可以加比較淡味少少嘅湯底，令到湯底冇咁鹹。輪到食材部份啦，我覺得間餐廳嘅牛肉真心好味，尤其牛冧肉同埋牛肩肉，好滑口同埋好濃牛肉味，不過記得吾好滾太耐，如果唔係啲牛肉就會好難咬。同埋佢話泰國粉絲好好食，好爽口，放入湯底入面滾熟，就可以索晒啲湯汁，好似食緊泰式湯粉絲咁。至於熟食方面，其實唔係太多選擇，例如有炒肉碎、肉鬆炒飯、青瓜沙律同埋蕃茄沙律等等，個青瓜同埋蕃茄沙律都好辣，所以我都唔係好食得落口，至於個炒飯，我就覺得係正常。另外甜品方面，選擇就更加少，淨係有班蘭糕同埋玫瑰糕。班蘭糕真係好好食，好香班蘭葉味，我一食就食咗四五舊。整體來講，我覺得間餐廳嘅食材真係算唔錯，不過個湯底可以再改善。