湘川滬 (粉嶺中心)

上次食過“湘川滬”覺得好唔錯，加上我朋友又送左張50蚊既優惠券比我，所以今年提早慶祝父親節，特登帶屋企人尼食依間川菜，因為佢地個餐牌有好多選擇，有好多唔同中式傳統既菜餚，可以揀清清地，濃味既或者辣，岩晒我地一家大細，老人家同小朋友都岩食。

我地個晚叫左個涼菜，鎮江餚肉，整得好好，剔透，有肥有瘦。

又叫左小籠包，每籠得四粒，所以一籠係唔夠我地食，佢地個皮都整得皮薄多汁，唔會好粉同好乾，水準唔錯。

叫左碟菜，清清地，味道外觀都正正常常。

仲有豆穌魚片，好香既豆瓣醬，香噴噴，魚肉滑嫩多汁，我媽媽好中意食魚，依碟魚片真係佢最愛。