兩三碗車仔麵 (已搬遷) 新店位置

因為想到慈雲山街市幫襯香港製造的午餐肉所以就到附近的餐廳食晏，揀呢間因為見到Openrice的食評不錯。食店裝修簡樸，座位不太舒適，如果我住附近一定會選擇買外賣返🏠屋企食。我哋早上11點多到達，唔使等位直接就坐。老公叫咗咖喱豬皮，紅腸，豬頸肉河粉配香辣咖喱汁（碗麵送到黎嘅時候佢話冇晒咖喱汁）。我就叫咗鮑汁魚肚，響鈴卷同蘿蔔銀針粉配少辣汁。我真心忠告各位只可以食少辣嘅朋友唔好叫少辣汁，真係太過超級🌶辣，我之後去左7-11買左盒🥛奶幫條脷同個胃降溫。開心嘅係佢哋嘅麵底有好多種類揀，有我最鍾意嘅銀針粉。鮑汁魚肚有一兩件比較硬，蘿蔔冇渣但唔入味（最愛文記車仔麵既蘿蔔，清甜冇渣），響鈴卷唔脆（我想建議店家既然響鈴卷都係現成買返嚟不如改供應炸魚皮，就唔會有唔夠脆呢個問題），老公話咖喱豬皮都係唔入味，豬頸肉就表現不錯，啖啖肉，唔係扁同乾嘅嗰種。整體感覺 - 車仔麵嘅餸唔夠入味真係致命傷，希望店家可以俾多少少時間煮耐少少。