堅信號上海生煎皇 (眾安街) (已搬遷) 新店位置

餐廳環境幾好，光猛乾淨，每張兩人枱中間都有擺隔板，而且一坐低就有店員送上放口罩嘅紙袋同即棄餐具，乾淨衛生。佢嘅午市套餐有一個主食加小食同嘢飲，我哋叫咗秘製豬扒菜飯同上海粗炒，小食就緊係要試下佢地嘅招牌生煎包啦。熱辣辣嘅生煎包好快送嚟，枱面仲有步驟教你點樣食。生煎包嘅外皮香脆，咬開入面湯汁好多，肉餡鮮嫩。食嘅時候要小心唔好辣番嘴。佢嘅豬扒菜飯好特別，豬扒用秘製醬汁嚟煮，甜甜地，令到豬扒唔會咁膩。上海粗炒都好食，好足料，肉絲同椰菜絲都好多。不過如果可以少啲油就好喇。