夏娃 (已結業)

呢間餐廳基本上Lunch Time好多時都爆晒場，因為佢D野又真係幾好食而且個價錢又好合理。佢個Lunch Set包餐湯或沙律再加一杯餐飲，最平五十幾蚊就有交易。是日餐湯味道OK啦，唔係純罐頭湯。大啡菇黑松露意大利飯，$65份量算多都真係幾抵食，D材料好新鮮，尤其是個大啡菇，個意大利飯杰杰地唔會太濕，好食。溫泉蛋芝士汁長通粉$68，水準之作，D長通粉條條都沾滿個芝士汁，好Rich，仲有個溫泉蛋都好正，點睇都會唔$68咁平，講真去茶餐廳食Lunch都要五十幾蚊啦，餐茶我加$8飲熱咖啡，真心抵食好食。