龍蝦燒 (已結業)

尋晚去咗佐敦同朋友落街食宵夜，食完宵夜徒步經文英街時，見新開一間燒烤店，個名叫“龍蝦燒”，行過門口見到店入邊好旺，有幾個企喺門口叫外賣，我忍唔住八下，“嘩~”，生猛龍蝦即劏即燒，38蚊一隻喔，我忍唔住想試下，我啲F話啱食完嘢唔好預佢，跟住我就自己要咗隻龍蝦，一隻元貝，一串牛柳粒。企喺鋪頭出邊，同F一路傾計，一路見到玻璃入邊啲大廚燒嘢手勢幾好，見到啲龍蝦好新鮮，俾人劏緊，搞到我好飽但係都好想食。等咗一陣，我啲牛柳粒燒好了，熱辣辣，擺入口十分野味，D肉質嫩滑。跟住試埋燒元貝，大大隻元貝同埋蒜蓉一齊燒，滲曬落去，好夠味，都不失本身鮮味。最後試埋燒龍蝦，都幾大隻，好遠都聞到好香。個F頭先話唔食都忍唔住想試半隻。大大啖龍蝦肉鮮嫩爽口，真係好好食！唔怪得出邊企咗咁多人喺度等。原來仲可以用芝士同XO醬燒，下次叫多啲人一齊來呢邊飲啤酒試埋其它燒嘢就更加正喇。講真，超值又抵食！一定要試下燒龍蝦，正！