六叔燒鵝 (已結業)

每個人都有屬於自己嘅 Comfort Food，就以我為例，最愛嘅當然係邪惡指數極高嘅香口炸物，而友人就特別鍾情燒臘飯。今日要去土瓜灣做嘢，辦完正經事，就約埋朋友嚟試下呢間新開嘅「六叔燒鵝」。聽講餐廳係由有超過 30 年經驗嘅師傅主理，店內更自設燒爐，每日新鮮燒製各款燒味，當中包括有明爐燒鵝、燒腩仔、切雞、叉燒、乳豬等。我哋點左燒鵝髀飯，轉瀨粉 ($88)、四寶飯 ($55)、白灼時蔬 ($15@) 同 飲品，堂食碟頭飯更有例湯附送。是日靚湯為粉葛赤小豆瘦肉湯，用料好豐富，湯身暖熱，味道溫和，健脾又袪濕。燒鵝髀好靚仔，大大隻，色澤光鮮，鵝皮挺直香脆，鵝肉厚身嫩滑，咬下沒有鵝膻味，入口充滿油香，但又唔會太肥膩，配甜酸適中嘅酸梅醬同滑溜的瀨粉吃，風味十足。另外碗四寶飯亦唔失禮，飯面鋪滿了叉燒、紅腸同油雞，另外仲有半隻鹹蛋同菜心，分量絕不欺場。叉燒咬落鬆化，口感軟腍適中，油雞皮爽肉嫩，加上惹味嘅紅腸同鹹蛋，送飯一流！ 白灼時蔬係蠔油菜心，菜心翠綠鮮嫩，有益又健康，食多啲都唔怕滯。食完仲可以慢慢嘆埋杯飲品先走，點熱飲只需+$2、凍飲+$4、而特飲亦都只係+$8，非常經濟。