鳴橋燒肉料理 (已結業)

大少收早，又可以出去搵好嘢食，呢啲時間唔洗同人迫就最開心~ 近來發現油麻地多咗好多好嘢食，於是行去望下~ 大少話好想食日本嘢，而我又好肚餓，放題就最好。路過見到呢間放題有燒肉，又有刺身，價錢仲要好抵，唔洗考慮，一於試下。$178 有咁多款嘢食，好抵，我地再加$40升級，因為個牛肋肉同帶子刺身好吸引。先黎一個刺身併盤，件件都好新鮮呀…仲有馬刀貝真係超好食，爽口鮮甜，大多數放題嘅刺身都好一般（除非係貴嘢啦）再黎叫咗牛肋肉，羊架，一口和牛，豬背肋，賣相都好新鮮，而且係肥瘦適中，先試牛肋肉，好多汁，冇點調味料都好好食，而且牛味超濃，升級咗真係冇錯，豬背肋之前都冇試過，原來係好爽口，有少少豬油香味，但又唔覺得好肥膩，好食！一口和牛粉紅色架，入口啲牛油出晒黎，正呀！其實其他嘅肉都好好味，好多時啲燒肉一係用醃料醃過，一係就用梳打粉，攪到冇晒肉味，呢度啲肉真係唔錯。另外仲叫咗海鮮，佢地都配大量蒜蓉，燒完真係好香。仲有天婦羅，即叫即炸，啲粉漿唔會太厚，好脆口。正！最後再叫多次豬背肋同牛肋肉，食完想再去食呀！總結：店舖雖小，但食物質素真係好好，呢個價錢真心抵食！