新德興茶餐廳 (已結業)

早幾日想搵間茶餐廳食個午餐, 諗黎諗去都唔知邊間好, 忽然師傅記得呢度好似有間, 於是決定去睇下; 去到門口又見到d燒味掛晒喺個廚窗度, 幾吸引下; 再睇下其他野食嘅價錢, 都可以喎, 於是乎決定入去試一試!入到去都幾多人, 好彩唔使等位! 坐底睇下餐牌有咩食啦, 而呢度維持一貫茶餐廳作風, 花多眼亂; 好唔容易先睇到野食, 喺落單嗰刻, 師傅懷疑自己中左燒味毒, 唔食唔得; 因為師傅最後都係叫左個叉燒紅腸飯加杯凍檸茶!轉個頭叉燒紅腸飯即到, 個賣相都幾得, 仲有幾條豆做配菜; 師傅二話不說即刻試下個紅腸先, 紅腸都幾鬆軟, 口感唔錯, 比龍華好好多; 叉燒就偏瘦, 色澤幾靚, 不過叉燒冇蜜味, 而且幾乾幾鞋, 差少少; 飯嘅份量極多, 都幾抵食; 而凍檸茶都幾有茶味, 又唔會太甜; 可以喎! 總括黎講食物質素暫時算係一般, 不過勝在款式多, 選擇多; 而環境普通, 服務都係一般, 呢度d伙計分兩種, 一種係落單另一種係執枱嘅, 執枱嘅係唔會幫你落單架; 價錢算係中價, 可以接受啦! 呢個燒味午餐, 師傅覺得都可以, 所以相信會有下次, 皆因想試下除左燒味以外嘅食物!