野郎Stone (已結業)

今晚又OT O到八點幾，點都好點都要醫下自己個肚嘅，嗱嗱臨上網睇吓有啲乜嘢正嘢食，喺尖沙咀搵到間石燒牛扒店，地理位置極方便，一出地鐵站行幾分鐘嘅厚福街就到啦。間鋪位於厚福街街尾，所以行到底仲要轉右先到，去到門口見到有一個自助售賣機，完全係日本風情，買完飛我揀咗個300g嘅西冷就入去啦，師傅一慣日本店舖嘅作風，大大聲歡迎你，完全好似去咗日本居酒屋咁呀。唔使等幾耐，師傅就拎咗一個熱石板上面有塊已經整好兩成熟嘅西冷俾我，佢好貼心咁有張廚房紙咁擋住啲油煙先，我好欣賞佢哋嘅細心，食幾熟就悉隨尊便，自己慢慢煎，另外餐枱上已經放咗三種醬汁，我就揀咗蒜蓉同醬油，完全可以調出牛肉嘅鮮味。切開舊西冷，啲肉汁開始流出嚟，我自己鍾意食得好生，所以輕輕煎左幾十秒就開動，牛肉好鮮嫩，而且牛香撲鼻，配埋一個小薯蓉球，300g份量真係啱啱好，加$20就可以有個沙律菜同埋任添薯蓉，不過我冇揀，由入去到食扒半個鐘都唔使，真係快靚正自選。