茶理史 (已結業)

夏日熱辣辣，熱到個人就黎溶之際決定飲返杯凍野保命。熟識木嘴嘅朋友應該都知我幾咁中意食芋圓，諗緊飲咩好嘅時候醒起唔知邊度見過有篇野介紹話尖沙咀開左間有得飲芋圓，即刻滿心期待狗衝過去！貪靚嘅木嘴時刻都注重養生，所以本身想叫木瓜雪梨潤一潤佢，點知竟然冇，大失所望。不過唔緊要，保命要緊，照嗌另一款芋香鮮乳小芋圓。落單嘅時候位咬住個包嘅收銀妹妹好似唔係好聽到我講嘢咁，我就指住個餐牌再講多次，相信應該唔會錯掛。落完單之後我好安心咁拎住張單睇都冇睇，但原來真係太天真，因為佢竟然真係落錯單，變左木瓜鮮乳小芋圓。木嘴我中文差，乜芋香同木瓜個發音咁似嫁咩真係長知識了。定依家D 00後母語係普通話，所以聽唔明我呢D方言呢。不過算，木瓜就木瓜我就當幫我個胸部進行第三期發育。睇個樣係咪好似好正咁呢？一飲，我已經好想扔左杯野佢。木嘴我要求唔高，大熱天時想飲杯凍野啫，但呢杯野竟然係完全唔凍，個底係暖暖地，個面就得兩粒冰（利申冇叫少冰/走冰）知唔知唔凍嘅奶係幾難入口...木瓜味又淡...而啲芋圓...咬落軟淋淋冇乜口感，再加埋啲暖奶，成件事係一個折磨。就憑呢杯所謂凍野，完全唔能夠救返溶緊既我，果日最後個嘴溶左，無嘴喇