農民泰國菜

营业中

休息中

黃竹坑返工想搵平靚快嘅野食選擇唔多，建議去南朗山熟食中心，呢到好多間餐廳俾你揀，價錢適中，總共兩層，而二樓就係泰國菜嘅集中地。今日午餐因為太短時間，所以就黎呢到食個快嘅Lunch Set。熟食中心呢到係無冷氣架，夏天會比較熱同有蚊。熟食中心環境比較無咁乾淨，同大排檔差唔多。同一層有另一間泰國餐廳，農民比起另一間價錢較高但坐位比較闊落舒服啲。但都係睇下邊一間岩自己口味重要啲。▶️青咖喱豬肉撈金邊粉青咖喱非常香濃，好夠味無溝水，但唔會好鹹。啲餸好足料，有茄子、南瓜、豆等等。豬肉新鮮而且好多片。金邊粉份量亦都好足，軟硬適中，配搭青咖喱就非常夾，每啖都會食到咖喱但唔會索哂汁發脹。▶️椰汁涼粉冰套餐加8蚊就有一杯泰式特飲，椰汁香，涼粉好多，就嚟滿瀉咁，亦都唔會太甜。仲有好多其他地道泰式飲品俾你揀，唔錯唔錯。雖然環境唔算太好，但味道都ok，係呢區比較好食嘅泰國嘢。建議秋冬天天氣比較涼嘅時候先黎食，夏天就外賣啦。