大興餐廳 (第尾牛扒) (已結業)

佢令我諗番起八十年代尾既總統餐廳同花園餐廳- 一種舊式扒房輝煌時代既美態（咁唔一定代表乾淨...但大興upkeep/service 都算係咁）。煙「魚倉」魚套餐，又曰「煙倉魚套餐」，有忌廉蟹肉湯、餐包、煙倉魚沙律同雪糕連餐飲。湯/ 包都係舊式扒房貨仔，但值得一記既係佢個忌廉蟹肉湯唔太杰同都幾多蟹肉碎。煙倉魚沙律原來係兩塊煎既煙倉魚扒加雜果沙律，附他他醬。煙倉魚扒厚度適中，唔單止新炸（個人覺得似炸多過煎），仲要係炸到比金黃色啡一度而又未燶o個隻，掂。雜果沙律當然夾雜o左罐頭貨仔，但諒佢上得大份、有口感同唔係用地捫貨，有o趙頭。叫貴餐既福利為有得食雪糕同唔洗加錢有得飲雜果賓治或者紅豆冰：值得一記係個雲呢拿雪糕球竟然係Mountain Cream（八十年代既雪山牌，唔係今日既Wall's）味...食到底先發現可能係自家製（「爆冰」）。