鼎王麻辣鍋 (金巴利道) (已結業)

每次去台灣都一定要食麻辣火鍋！而且每次都會去鼎王，貪佢多分店，同埋有無限量鴨血提供！喺香港嘅時候，常常都好掛住台灣嘅鴨血，可惜出邊都比較少地方有，同埋賣得偏貴，所以唔係成日有機會食。一聽到台灣嘅鼎王喺香港開分店，超開心，即刻約咗朋友去試佢嘅裝修同台灣都有幾分相似，幾雅致，氣氛寧靜，坐得好舒服。點餐係用iPad自己㩒，菜單同台灣都幾相似。湯底方面，我點左個鴛鴦湯底，揀咗小辣，有麻辣鍋及酸菜鍋，麻辣鍋入面有豆腐同鴨血，都係無限量添加的。酸菜鍋嘅酸菜亦都可以無限添加。我encore左鴨血好多次，食得好開心。呢度嘅鴨血都好軟嫩，好QQ，好似果凍咁。酸菜湯底好開胃，白肉都幾多。牛肉方面點左去骨鮮肉，每件都幾大塊，雪花分布均勻，幾有牛味。豬肉就點左日本黑豚肩肉，食落都幾嫩。另外仲有點左個御選小羔羊，輕輕一燙就食得！肉質都幾鬆軟美味。另外仲有叫咗個干貝滑，入面都幾多干貝！同台灣食嘅味道一樣。最後當然唔少得叫個菜啦，吸盡麻辣精華咁食，好正！