行到門口,原來仲要行樓梯上去.推門就見到好多菜係我眼前(因為店內亦有售賣有機菜).睇雜誌話D菜係老闆自己種家;店鋪似係住屋既改成,分室內同室外.咁熱梗係要室內啦.
蒜蓉包大大塊,熱騰騰,外皮脆到不得了. 包身軟淋淋.
餐湯係麥皮粟米湯.湯底稀稀地,不過麥皮飽肚.簡簡單單又健康, 反而做早餐就好D.
煙鴨胸拼司華力腸意粉: 鴨胸同司華力腸兩樣都係似出邊買番黎.意粉白烚.蕃茄蓉係新鮮無添加,一D調味料都無加,真係原汁原味,所以感覺味道偏淡.
白酒龍利柳意粉: 龍利柳煎得好好,唔過火.唔腥.白汁加入白酒,配合得相當好,因為我個人好怕白汁既厚膩,唔係唔鍾意白汁,係覺得食完白汁,就食唔到其他野.但係呢碟白酒龍利柳完全無傳統白汁厚膩既感覺,好清新.質感好簿.好鍾意.配菜既潺菜葉質厚身,好肉地,滑潺潺.菜味濃郁,無添加.最後係蕃茄啦.只係簡約咁煎一煎個表面.食到茄身好肉厚,又JUICY.WELL…新鮮就係咁簡單.
加$15要左杯雪梨汁. 雪梨汁一粒冰都無,無加糖.飲落仲有籽家.反而熱咖啡就無咩特別啦.所以推介大家加錢飲新鮮果汁.果日去仲有蘋果汁,火龍果汁…等等選擇.
可能平時出街食既都落左調味料,樣樣都味道濃烈.黎到呢到食既野淡味左,真係唔係好慣.不過間唔中黎感受下田園風味,呢到係唔錯既選擇.同埋佢比到我以前係澳洲食飯既感覺,新鮮唔落調味料都感覺良好.咁既價錢食一餐營養餐,抵~~
有些少建議:如果係元朗搭巴士出發既,係錦田郵局落車,望對面馬路就見到門牌;
揸車既就要借人地附近食店既車位啦,附近無咩公家車位.
出發前最好打去問清楚此店時間,因老闆可能會下午外出補添食材.無謂白行一場.
錦田紅磚屋就係附近,不過只係星期六,日同紅日先開,大家可以去呢到食飯之餘順便行埋紅磚屋呢個景點.
大家記住帶現金~~~
1
2
2
