落單叫左6個餸：
🌟🌟🌟🌟燒味拼盤（叉燒/燒腩仔/油雞）$178
🌟🌟🌟🌟🌟椒鹽九肚魚$108
🌚🌚🌚🌚半煎炸蠔仔餅 $98
🌚🌚🌚🌚鳳梨生炒骨 $98
🌚🌚🌚金銀蛋浸白菜仔 $88
🌟🌟🌟瑤柱蛋白炒飯 $88
燒味拼盤每樣都好好食，半肥瘦叉燒，唔太肥嘅油雞，脆口嘅燒腩仔，調味都適宜，唔需要再點醬汁，但尼個價錢份量少左D。
椒鹽九肚魚係今晚嘅MVP，炸皮好薄，入口外脆內軟，就算放涼左都好脆👍
瑤柱蛋白炒飯真係等到頸都長，第一次催佢叫你等等，其實係漏左單，催左第二次先上枱，明明想有飯夾餸食，但個炒飯就最遲上，差唔多遲左成個鐘。結果上到枱，明顯師傅趕時間，炒得唔夠乾身，同埋份量少左D，味道就正常。
金銀蛋白菜仔味道都正常，但用埋D下欄皮蛋，D蛋白好鞋口，蛋黃無咩味。
鳳梨生炒骨，鳳梨得兩舊，最多係三色椒同洋蔥，生炒骨明顯用前晚貨仔再翻炸，炸到又乾又硬唔好食。
成餐飯最離譜係炸蠔餅，成世人未見過咁厚粉嘅蠔餅，筷子夾開，厚過包紙巾，明顯見到好多洞洞嘅粉漿，一定落左好多發粉，已經唔係蠔餅，係蠔鬆餅。唯一係D蠔好大粒，唔係珍珠蠔。
環境超躁，傾計都有困難。成晚又漏單，賣單時又入錯單，張併枱個白飯計左我哋枱，好彩睇清楚，收銀再出過張單睇岩先俾錢。
總結，無咩服務，食物質素好飄忽，應該唔志在做新客生意。
