海皇園林酒家

营业中

休息中

年近歲晚又到team gathering時間。公司找數梗係唔可以唔豪，今次就按每年慣例，去鯉魚門歎海鮮。先嚟個炸乳鴿熱身，雖然叫乳鴿但都幾大隻吓，肉厚又嫩滑，唔蘸淮鹽都夠味。食海鮮點少得龍蝦，爽彈鮮味，仲有伊麵底，大滿足！豉椒蟶子，睇個殼都知大隻，豉椒非常惹味而且辣度適中，極力推薦。薑蔥蠔煲熱辣辣，薑蔥好香口，蠔又大隻。瀨尿蝦好多肉，而且新鮮肉唔黐殼，件件都咁大件。鹽油焗奄仔蟹當選全晚最正。奄仔蟹大隻、蟹羔極多，蟹肉鮮甜。我地全晚最靜就係食奄仔蟹時間，好食到個個掛住食唔駛講嘢。餐後甜品係木瓜，清香甜蜜。呢餐有排回味。