西貢海灣會燒烤大王

適逢星期日，我就同兩個朋友BBQ加影下相。呢個BBQ場真係好值得推介，環境好靚，地面鋪滿哂草皮，好有feel，問返原來個場可以用做婚禮場地，唔怪得咁靚。而旁邊就係一個無敵大海景，水天一色，一落去就係沙灘，想游水都得。 而且呢到既服務都非常好，服務員好有禮貎好親切，亦會幫手起爐同講解。 BBQ食物就當然係主角，呢到既食物都好齊全，丸類肉類都有好多款同唔同口味，而且都幾高質，亦有蔬菜，海鮮都有得另外訂。最正係有飲品任飲，除左一般汽水之外，仲有果汁任飲，係燒烤必備。以下係幾樣特別推介既食物。 墨魚丸肉質好爽好彈牙，入面仲有粒粒墨魚肉，以燒烤任食黎講絕對係極高質，可以燒多幾粒。 而豬頸肉係厚切，一大塊，但燒完都依然好爽好嫰，好似食緊爽口既扒咁，加上調左味，就咁燒已經好好食，好正。 雞扒好嫰口，而且雞肉味好濃郁，係幾高質既雞扒。黑椒味唔算好濃，如果想食濃味D既可以自己加牛油或者蜜糖，自己調味特別好食。 雞翼有好多唔同味道，每款都唔錯，而且仲有雞中翼同雞全翼。不同雞全翼相對黎講難燒，對自己廚藝冇信心既朋友就真係要小心D燒。