御鐵

营业中

休息中

約左好耐冇見嘅朋友相聚，大家食野都咁腌尖，由朋友發辨揀咗間鐵板燒，又真係好唔錯。沙律鋪咗海量蟹肉，嫩滑鮮甜，沙律菜全部新鮮爽甜，當中第一次試到蓮芋，鬆化多汁幾得意。瀨尿蝦大隻厚肉，喺鐵板燒上面無論肉定殼都燒得好香口，啖啖肉到有種食緊龍蝦嘅錯覺。 師傅將瀨尿蝦斬件之後原隻上菜，腳亦都好細心咁剪開左，由頭到腳都冇浪費到。南非孔雀鮑魚用牛油煎香，鮮甜味好濃，彈牙厚肉，仲好特別咁配三文魚籽做調味，個種鹹香原來同鮑魚好夾，鮮上加鮮。 鮑魚肝燒到焦脆，甘香濃郁。 海苔忌廉醬都有啲驚喜，清新嘅奶香無論配濃或淡味野食都好夾，相得益彰。A5和牛厚燒原來會喺席前用櫻桃木煙燻，視覺效果滿分。 和牛外脆內嫩，啱啱好五成熟，油花好夠，有肉汁、牛味濃，配炸獨子蒜同wasabi再將味道昇華，食到好幸福。清酒煮蜆湯用左好新鮮大隻嘅花甲，煮到啱啱開口就夾起，再將高湯熬多陣之後淋落去，簡單清淡，淨係靠食材原味已經好好飲。第一次食鐵板燒以蛋包飯作結，幼滑嘅煎蛋包住和牛粒炒飯，未完全熟晒仲有少少蛋汁，配自家製清新嘅蕃茄汁，媲美出面蛋包飯專門店嘅出品。柚子雪糕好清新，食到粒粒果皮，由頭到尾都心滿意足。