野將 (已結業)

Item: 野將
Rating: 0
Author: 無聊人

Ginger Ginger

4.5

84 食记

味道

环境

服务

卫生

抵食

2226

铜锣湾

$101-200

多国菜薄饼汉堡包 All Day Breakfast

無聊人

等级4

643

其實我地幾條友，真係好難得出城，買完台灣好出名果杯珍奶，一路飲一路遊蕩之際，見到呢座大廈好似好多嘢食，仲要排哂隊搭電梯，好似好勁咁，而呢間叫做GINGER GINGER，主打新派東南亞菜式的餐廳，見佢燈箱介紹好似好多嘢食，有PIZZA、PASTA、RICE、NOODLE、BURGER、SOUTHEASTASIAN FOOD，橫掂都唔知食乜好，就心口掛個勇字，一行4人殺上去試試~原來呢座大廈好細，每層只係一間餐廳，基本上部電梯一打開，就係果間餐廳門口，如果冇人一齊搭電梯的話，我真係想逐層打開，睇下邊間合眼緣，不過佢成廿幾層，又唔知係咪層層都係食肆，都係去返9樓呢間GINGER GINGER算吧~一打開電梯門，就見到仲有度玻璃門，入面好光猛，木傢具裝修，open水bar，感覺好乾淨企理，因為之前下面果啲係一開門就黑炆炆，懶有情調咁，其實食嘢更係光猛好啦~如果黑炆炆，食咗乜都唔知，呢度幾啱我心水~推開度玻璃門，見到只有一、兩枱客，仲有好多吉枱，店員招呼我地坐卡位，然後送上menu同水，當時心諗會唔會中伏? 無理由星期六晚7點半呢啲黃金時間會冇乜客架嘛~ 不過唔驚，响我地一路諗食咩同等食嘢之時

其實我地幾條友，真係好難得出城，買完台灣好出名果杯珍奶，一路飲一路遊蕩之際，見到呢座大廈好似好多嘢食，仲要排哂隊搭電梯，好似好勁咁，而呢間叫做GINGER GINGER，主打新派東南亞菜式的餐廳，見佢燈箱介紹好似好多嘢食，有PIZZA、PASTA、RICE、NOODLE、BURGER、SOUTHEAST
ASIAN FOOD，橫掂都唔知食乜好，就心口掛個勇字，一行4人殺上去試試~

原來呢座大廈好細，每層只係一間餐廳，基本上部電梯一打開，就係果間餐廳門口，如果冇人一齊搭電梯的話，我真係想逐層打開，睇下邊間合眼緣，不過佢成廿幾層，又唔知係咪層層都係食肆，都係去返9樓呢間GINGER GINGER算吧~

一打開電梯門，就見到仲有度玻璃門，入面好光猛，木傢具裝修，open水bar，感覺好乾淨企理，因為之前下面果啲係一開門就黑炆炆，懶有情調咁，其實食嘢更係光猛好啦~
如果黑炆炆，食咗乜都唔知，呢度幾啱我心水~

推開度玻璃門，見到只有一、兩枱客，仲有好多吉枱，店員招呼我地坐卡位，然後送上menu同水，當時心諗會唔會中伏? 無理由星期六晚7點半呢啲黃金時間會冇乜客架嘛~ 不過唔驚，响我地一路諗食咩同等食嘢之時，都一路好多人搵到上嚟，有情侶、有一家大細，唔知係咪我地旺場呢?

由於隊咗杯珍奶，個人都飽飽地，已經冇興趣選擇食物，呢個重任就交比另外三位，而我只係諗仲想飲咩?

個menu只有字，冇只供參考的圖片，唯有上OR睇下食評同相，但有啲睇中相，但唔知係乜，唯有問下店員，好彩店員都好耐心回答我，唔覺我地麻鬼煩，終於成功點餐~

本身可以淨叫凱撒沙律，但好似好DRY咁，於是加咗煙三文魚，除此之外仲有烤雞肉同燒豬頸肉可以選擇~

原來煙三文魚除咗好食之外，賣相都好正，將三文魚卷成一朵花, 再放响嫩綠沙律菜上，加埋芝士碎，好有意境~ 不過好相機食完之後，成個靚境好快就比我地破壞咗~ 咪睇朵花好似細細朵，原來係由兩大塊三文魚卷成，每人可以分到半塊，算係好多架喇~

不過佢啲沙律菜種類比較少，好似得兩種，一種係羅馬生菜，另一種唔知係乜? 其實我都少食凱撒沙律，唔知咩叫正宗? 總之啲菜係新鮮乾淨，對我嚟講已經係可以接受~

呢味其實係睇OR其他食家post果啲相，好似好吸引，就咁睇相真係唔知乜東東? 只係知佢係焗嘢~ 呢個時間當然要麻煩店員介紹啦~ 原來佢就係芝士冬蔭公肉醬焗薯角，真係完全估佢唔到，咁當然要嚟試試啦~

不過當見到真身時，又有一個疑問，就係上面一齊焗果啲肉碎，究竟係乜肉? 因為我唔係牛肉的，又要麻煩店員解答~ 果然真係我唔食的牛肉，好彩食之前問一問，唔知叫之前話唔食牛肉，可唔可以改成其他肉呢?
呢個我唔記得問店員，唯有下次有機會再食的話，預先問問~

當知道係我唔食的牛肉，即係其實我連個醬汁都試唔到，我只係食咗邊邊冇醬果啲薯角，焗得好香，至於個醬，朋友話好正，有冬蔭公味得嚟唔會太辣~

真係估唔到啲雞翼咁大只，响其他餐廳食果啲雞翼，好似發育不良咁，細細只，但呢度個水牛城烤雞翼真係抵食，有6大只雞翼，最好就係佢個醬分開上，唔會整淋啲雞翼之外，仲啱哂我呢啲唔食得辣，但又想試下，我可以點少少汁試，原來都唔算好辣，可以接受到，所以又可以點多少少汁~ 個雞翼炸得好脆口，個脆皮唔會好厚，薄薄一層，雞翼又啖啖肉~

呢味又係上OR睇相想試，原來佢叫蘇梅島風情薄批，餡料有雞肉、白菌、洋蔥、彩椒、車打芝士、馬蘇里拉芝士、青咖哩醬，店員推介薄批，比着平時，我一定叫厚批，但果晚真係唔餓，所以照試薄批~

不過薄批一定要趁快食，因為第一塊新鮮熱辣上枱果陣，個批皮好脆口，但第二塊個皮比啲餡整淋咗，所以冇咁好食，佢實在太薄，好易吸水，但厚薄始終有返咁上下厚度，所以冇咁易被整淋~

我覺得啲餡料同芝士唔係好夠多，唔夠啖啖餡同唔太拉到絲，不過個味道就好鬼泰式feel，當時都唔知佢係用青咖哩醬，但總之你一啖落去，就覺得係食緊泰國嘢啦~

呢個就真係夠哂特別，响西餐廳唔會食到，响泰國菜又唔會有得叫，因為佢係西泰菜，泰式海鮮青咖哩意粉顧名思義係泰式青咖哩醬加海鮮去煮西式意粉，估唔到味道出奇地夾，咪再以為意粉係要配茄汁或者白汁果啲西式醬汁~

再估唔到的係勁多海鮮，有2只青口、2只大蝦、魷魚鬚粒、墨魚圈、蜆仔肉等等，大家share食就樣樣都分到啲；而意粉的質感亦剛剛好，唔會太硬或太淋~

大家見到special drink個menu，都比佢色彩繽紛的圖片吸引住，話就話圖片只供參考，但相信真實都唔會有太大差別掛? 於是有2個叫咗嚟試，分別係青瓜奇異果冰茶同蜂蜜檸檬梳打，另外2個就叫咖啡試，有凍海鹽焦糖意大利鮮奶咖啡同薑汁拿鐵，各有特色，各有驚喜~ 而且每杯都好似藝術品咁，所以店員都唔想破壞佢，將飲管同搞搞棍分開上，諗住將呢個破壞藝術品罪名交返比顧客~

青瓜奇異果冰茶

真係有新鮮青瓜片同奇異果粒粒架~ 青瓜片插响冰上面，而奇異果粒粒就沈响底，中間係啡紅色的凍茶，配搭得好靚，但搞勻之後就………………….

蜂蜜檸檬梳打

其實都唔明點解呢杯嘢會係紫色撞黃色? 蜂蜜同檸檬都係黃色，而梳打係透明，不過唔理咁多，最緊要係好飲，而且顏色夠靚，打卡呃like最啱~

凍海鹽焦糖意大利鮮奶咖啡

其實係凍意大利鮮奶咖啡，只係將海鹽同焦糖灑响泡泡上面，成個造型好鬼靚，真係唔想搞亂呢杯藝術品~

除咗靚之外，呢杯啡仲啱哂鍾意飲啡人士，因為通常凍啡比熱啡冇咁濃味，但呢杯凍啡都好夠濃啡味，唔知我朋友飲完果晚有冇瞓唔着呢?

薑汁拿鐵

其實我都唔好咖啡，但頭先飲咗杯珍奶，唔想有衝突，都係叫返啲同類好啲~ 咁啱响我諗緊唔知飲乜好時，店員向我推介呢款，話真係用新鮮薑即磨汁，咁又好似好吸引咁，未試過咖啡加薑汁，於是本着勇於試新嘢原則，就叫嚟試試啦~

原來除咗薑汁，仲有啲薑茸磨响啲泡泡上面, 飲落去好似飲緊薑汁撞奶，完完全全係果個味道，都幾有趣，但飲多兩啖時，奇怪點解好似唔係好覺有啡味? 即刻撥開啲泡泡，見到下面係奶咁色，完全冇啡色，就好奇問問店員，而店員又問問負責沖飲品果位仁姐，原來呢個就係薑汁拿鐵的特色，係冇咖啡成份的拿鐵，好彩咁啱符合我唔好啡，如果人地係想飲真拿鐵，咁就唔好叫呢個喇~

總括嚟講，價錢唔貴(以CWB嚟講)，食物選擇多，味道及質素超水準，店員服務態度好，環境乾淨企理，係一間幾值得去的餐廳，不過可惜太遠，對我呢啲鄉下婆，要出成先食到的話，再食的機會不太大，但值得推薦的~