見元朗間校長燒肉有$328嘅3小時刺身燒肉火鍋放題，仲要4人同行，1人免費，我地4個人就啱啱好，連加一為起都係每人~$270。
可能早去嘅關係(~6點)，人唔滿，侍應安排我地坐卡位。卡位好闊落，可以坐6個人，只係坐入面嘅人出入無咁方便。
食物種類好多，有刺身(5-6款)、壽司、日式凉拌(如中華沙律、螺肉、墨魚仔)、沙律菜、雜果。我只係食咗三文魚、中華沙律同螺肉，不過不失。
亦有各款中式蒸點、炸物、鹽焗蛋，各式熱葷，又啱食嘅話，真係未正式開始燒烤同火鍋都飽咗一半咁滯。不過我全部無食，主打食燒肉。
燒烤同火鍋料都多，質素正常。唔使三舊水都唔應該期待係好高級數嘅食材，過得去就ok。仲有甜品添，都應該收貨啩。飲品都係啲大路嘢，款式都多嘅。
其實近年食自助餐/放題都唔會食好多嘢，不過勝在咩都可以試下，而且今次食3粒鐘真係可以同朋友傾餐飽。滿足。
