喜善中餐廳 (已結業)

一家七口去食，有75折，每人二百幾蚊食到自助餐真係超抵。餐廳光猛，枱與枱之間闊落。有任飲冷熱水同橙汁。大概有十款冷盤，二十款熱盤同二十款甜品，仲有壽司同刺身。廣告講所謂貴價嘢只係曇花一現，鳳尾蝦、帆立貝等全晚只係出過一盤，夾曬就會出第二款餸。如果唔落足眼力就會錯過心水餸菜。值得一讚嘅係片皮鴨。回本之作。師傅切到大大片，有皮有肉，夠熱夠香。相對塊餅皮太細，好難包得曬舊肉。另外好食嘅有XO醬蘿蔔糕，仲有半肥瘦叉燒。甜品亦唔錯。紅豆糕，芝麻糕，椰汁紫米糕都足料夠味。總結係，其實得一兩樣可以叫好食，但咁嘅價錢預咗食咁嘅質素嘅嘢就唔會失望啦～