銀杏館 (已結業)

得我同阿媽兩個人食飯，費事煮，於是去咗銀杏館。上次黎要排隊，等咗好耐最後放棄無等。今次早d黎，唔洗等。兩個人仲可以坐四人枱。d阿伯都幾好禮貌。要了二人$168套餐。有白灼有機菜、兩個小菜，燉湯同飯。要了至愛蕃薯苗。真係無花無假嘅白灼，一滴油同鹽都無。超無味；蕃薯苗唔夠嫩，條莖好難咬。是日燉湯係蟲草花茶樹菇杞子豬湯。好清，藥材味濃，又唔肥，超夠熱，好好飲。蟲草花唔知係咩植物，好幼身，幾有咬口。小菜就要了粟米斑塊同中式牛柳。粟米斑塊又係鹽都唔多粒，好淡。個粟米獻太杰，一pat pat。斑塊就唔錯，炸漿薄，魚新鮮唔腥。中式牛柳味道較濃，好少少，有番d味。牛柳好natural ，完全無嗱過。不過就用刀背拍過...你估係豬肉咩，牛肉越拍越韌架！牛肉都幾鞋口，同有少少韌。飯可選三色飯或白飯。由於我牙力麻麻，所以揀白飯穩陣。整體黎講，味道比屋企飯仲要淡。我地呢d濃味人就覺得成餐飯都無咩味。