閨•家 (寶榮大廈) (已結業)

收工唔想煩食乜之際，不知不覺就行左入嚟食閨家，食過幾次，無味精慢煮靚湯確實值得一飲。海底椰粟子煲豬展飲得出係無落味精既靚湯，唔會有味精果種好鹹好口乾既感覺，清甜滋潤，止咳潤肺。秘製咖喱魚柳飯可以揀唔同程度既辣度，今次試小辣，食落反而覺得一啲都唔辣，下次可以試下中辣。魚柳、薯仔同蘿蔔既比例好平均，唔會多肉少菜。手剁香煎蓮藕餅配紫薯麵每次都必試既蓮藕餅，外層煎至呈金黃色，食落有一粒粒蓮藕既口感。紫薯麵口感煙軔，都幾特別。涼拌海蜇手撕雞好大碟，帶點點涼意既手撕雞拌左芝麻醬，作為冷盤前菜都幾開胃。炸饅頭配煉奶都係每次必試既炸饅頭，外層金黃香脆，作為最尾一個簡單既甜品真係無得輸。凍奶茶奶味偏重，中規中距。