小魚兒 (富麗花園) (已結業)

屋企人喜歡吃魚，除咗將軍澳海濱多新餐廳，其實喺寶琳呢邊都有好多質素唔錯嘅餐廳可以選擇。今次就帶咗媽咪嚟富麗花園樓下嘅小魚兒食烤魚。因為唔食得辣所以揀咗江團魚老壇酸菜魚豆花bb辣，再揀咗啲配菜，條魚嚟到嘅時候真係嘩咗一聲，好肥美再加埋酸菜都好足料，湯好夠味！本身唔知道原來豆花嘅意思係滑豆腐，所以烤魚又有配菜又嗌咗一碟，另外鍋底仲會有黑木耳、青瓜、寬粉同豆芽，呢啲都可以唔使重複叫。一開始一定係食咗響鈴先，索哂酸菜魚嘅湯底好好食，下次可以挑戰下小辣！另外配菜仲有得揀海參一碟有五至六條，都幾抵食。江團魚烤過嘅皮好香口，冇乜魚骨啖啖肉，煮得耐肉都唔會好鞋，媽咪食得好開心！加上條魚真係好大條，兩個人食烤魚個份量已經好夠，下次可能另外再叫啲串燒唔加烤魚配菜，因為串燒都好似好惹味好吸引。飲品叫咗荔枝乳酸爆珠同鹹檸七，雖然飲品有啲貴，不過食熱辣辣咁惹味嘅烤魚，一定要配返凍冰冰嘅特飲。