麵麵 (已結業)

過咗聖誕一排，又開始出街搵食，上網見到呢間餐廳好似幾健康，就一於嚟試下！一般餐廳嚟到會畀杯水或茶你先，但呢度好特別，係畀個魚湯你飲。味道好濃郁呀！我點咗個西班牙煙燻黑毛豬濃魚湯魚烏冬。。個名好長呀！ 每個餐都配特式前菜小食，嘢飲跟餐有優惠。黑毛豬味道偏淡，感覺健康，另外配咗個辣醬來調味。但就覺得切得厚咗少少，所以咬落去有啲煙韌。朋友點咗個麵麵圍城，跟魚麵。呢個餐除咗跟魚湯，仲有個麻醬可以撈麵食。九格小食每隔少少，但成個餐食曬都好飽。每格小食味道出色，各有特色。其實我哋特登一個要魚烏冬一個要魚麵試下個分別。相入面左邊係魚烏冬，右邊係魚麵。魚烏冬煙韌滑口，魚麵爽滑彈牙，魚麵佔魚肉嘅成份較多。另外點咗個小食就係新出嘅黑松露忌廉戒指魚皮雲吞，我開頭以為係魚皮餃嚟嘅添！黑松露味道唔算濃，亦都覺得真係食緊魚皮餃咁😂。餐飲點左凍水果紅茶同愛爾蘭忌廉咖啡，每杯都係補返1x-2x，好抵！