發發快餐 (已結業)

細個果時屋企人間中會帶我去啲舊式快餐廳食炸雞脾同粗波浪薯條，今時今日呢啲快餐廳已經所餘無幾咯，雖然我唔係屯門長大，但知道呢度就有呢啲懷舊嘢食，趁有機會就嚟回味下啦。呢次叫左炸雞脾飯，個雞脾真心好味，皮係脆同乾身嘅不過內裡係好嫩滑，炸得剛剛好，隻脾有淡淡嘅咸味唔會過份，配埋個洋蔥汁、白飯，兒時感覺返晒嚟！仲有餐湯加飲品，至緊要係果份人情味，希望日後再有機會可以光顧，發發唔好被淘汰。