新泰東南亞餐廳 (已結業)

今晚兔女農曆生日, 同兔仔及家人一齊慶祝, 黎到兔女幾鍾意既新泰開餐! 5個人點左8樣野, 勁!軟殼蟹米紙卷 - 軟殼蟹係兔仔至愛, 炸得鬆脆, 米紙唔會太厚, 點上酸汁食, 係一道唔錯既小食!冬蔭功 - 細妹近期成日想試酸野, 呢個冬蔭功唔太辣, 微酸, 可能係就返香港人口味, 蝦既數量都頗多, 有7,8隻, 都可以分到每人2碗仔!炒菜苗 - 菜苗本身夠爽, 加上蒜茸一齊炒, 幾香!小食拼盤 - 妹夫鍾意生菜包, 細妹鍾意蝦餅, 兔女就鍾意春卷, 呢個拼盤啱晒大家! 春卷炸得好脆, 蝦餅一般, 反而魚餅有驚喜, 好香香葉味, 好食! 如果個碎豬肉生菜包可以辣返少少就好喇!濕粉海鮮河 - 兔女無試到, 因為好快就被清光碟, 味道應該唔錯燒魚 - 魚肉好滑, 加上酸辣汁一齊食, 好快又被掃光~青芒沙律 - 呢個係全晚最有驚喜既一道菜, 青芒唔會太酸, 加上泰式沙律, 最得意係伴碟既炸脆, 炸得好鬆化, 伴埋沙律一齊食, 口感好特別, 推介!今餐兔女其實係為左咖哩麵包焗軟殼蟹而來, 竟然唔記得影相 今次軟殼蟹淋左, 有D失望, 但麵包同以往一樣焗得鬆軟, 點住咖哩食好味!