華姐清湯腩

营业中

休息中

聽講呢間華姐清湯腩好似幾出名，趁放假就同屋企人嚟試吓。晏晝一點半嚟到，已經要開始排隊，我哋排咗大約10分鐘，就有位坐啦。我哋全部都嗌咗清湯牛腩河，各自拼墨丸、魚蛋同蘿蔔。佢個湯底都算清甜，牛腩嘅份量都幾多，但係比起一般嘅牛腩略嫌瘦左啲啲，個人認為如果帶返多少少肥嘅話應該會更加好食。墨丸都幾大粒，可以食到啲墨魚粒，幾好食。蘿蔔都算大件，好清甜。不過魚蛋就普普通通，冇乜特別。不過值得一讚嘅係佢嘅炸雞翼，十蚊一隻雖然係有啲貴，但係真係炸得好好食，啲雞肉好嫩滑，外脆內熱，如果大家黎食嘅話都不妨試吓啦。