Dodam Chicken (1亞太中心) (已結業)

Dodam chicken向來喺韓式炸雞界都相當出名，店舖環境舒服，以深藍色系為主調，俾人感覺有種深海寧靜嘅感覺。睇睇餐牌，選擇唔少，傳統出名嘅韓式美食呢度都有，以炸雞、烤雞、一啲韓式小食為主。我同朋友兩個人，所以就揀咗一款兩味嘅烤雞，蜂蜜牛油香蒜焗烤雞同白雪芝士雞，兩隻烤雞味道都唔錯。個人來講比較鍾意蜂蜜牛油香蒜焗烤雞，蜂蜜加牛油呢個配搭基本上冇得輸。至於白雪芝士雞，廚師落粉落得好大方，整體偏甜。另外都叫咗海鮮煎餅，煎得香脆，裏面有大量嘅蔥同少量嘅海鮮。係澱粉質放題，食落都相當飽肚，點上佢個辣汁，可以消減啲膩氣。嘢飲方面，我哋叫咗柚子米酒，比起一支支超市買到嘅米酒，我都係更加鍾意餐廳自己嘅調配，不過佢哋呢個柚子米酒就比較偏甜同埋濃稠。