Goobne Chicken (天晉匯2)

营业中

休息中

今日晚餐想食炸雞，就嚟咗Goobne Chicken，估唔到而家連將軍澳都開咗分店。我哋嗰日七點五十幾分去到，外面有人排緊隊，但明明見到入面有好多吉枱，但完全冇員工去執枱，結果等左好耐先可以安排到幾張枱同時入去。我地三個人叫左三款野食，首先係砂鍋魚糕湯，呢個湯冬天飲應該好正好暖胃，有少少辣辣地，入面有魚糕，幾款唔同顏色嘅魚蛋，原粒雞蛋同菜，可能我本來唔太鍾意食魚丸，覺得味道都差唔得幾多，不過就夠彈牙嘅！之後就係韓式雞蛋捲，雞蛋入邊包住火腿青瓜蘿蔔， 雞蛋好滑，配埋醬汁好好味！最後係主角韓式BBQ醬煙燻烤雞，我哋揀咗有骨，雞肉非常juicy，就算雞胸肉都唔會覺得鞋。BBQ醬有少少微辣，食落好香，因為佢係烤雞，所以無左層脆脆嘅外皮，雖然有啲失望，不過冇咁熱氣啊！炸雞係好好味，不過價錢都偏貴，一次半次就可。