森記粥店 (麗閣商場)

营业中

休息中

頭先晌陳儀興牛什粉麵食完碗豬手粗，諗住食埋夜晚果餐，於是晌森記粥店叫碗艇仔粥＄20同爽滑炸兩＄12。睇舖係得一個姐姐仔，收銀煲粥都係佢。晌等候取餐期間，見到前面個熱柜放住一條半油炸鬼，呢半條油炸鬼已經收晒身縮咗水，唔知放晌度做乜唔掉，擺晌柜度展覽。環顧成個場都坐咗好多無乜點幫襯既老人家，後生仔好少。大部份人志在嘆免費冷氣。開餐起筷就先夾件炸兩食，豉油是熱的，腸粉保持室溫，唔爽兼鞋過阿媽塊面。到咬腸粉入面件油炸鬼，簡直係窮鬼都唔會食，又凍又硬容乜易哽死。我唔係老人家，平時咁貪食亦只能頂咗3件，其他全部剩低晒。艇仔粥係生滾粥，我係親眼睇住佢煲，粥底還可以，可惜啲配料太少，免治牛肉都唔多見，魷魚鬚好細條。要讚係放晌粥面果幾粒花生特別香脆，可謂妹仔大過主人婆。開舖難，守業更難。如果時光可以翻轉頭，我情願晌陳儀興食多一碗豬手麵。