茶一 (已結業)

呢日又喺鰂魚🐠涌上堂，咁緊係要喺附近覓食啦。放咗學行下行下就過到去炮台山呢邊，主要係想去油街，沿途經過間飲品舖，實在太吸引我喇，因為有神級冷氣🌬，正啊，而且有大大個易拉架介紹有乜嘢飲，所以我同個frd都一人買咗一杯🥤。我要咗芝士奶蓋黑糖珍珠奶茶($29)，要咗半糖少冰，果然係跟足指示，珍珠大小適中，夠煙韌，黑糖味濃，由於要咗半糖，所以靠啲珍珠吊味啱啱好👍🏻，我好驚太甜🙅🏿‍♀️。而佢嘅奶蓋係偏咸，同我想像中唔同，成杯飲品變咗有唔同層次嘅味道。😂朋友就要咗😇天使(焦糖鮮奶牛乳布丁)($28)，落單時店員話呢杯本身無糖㗎，定Set好咗，所以唔洗揀糖量。呢杯係鮮奶所以係白色㗎🥛，我偷飲咗啖(幾啖)，又幾好飲啵，同樣哋唔會太甜，而且個🍮布丁好夾，焦糖味淡淡哋唔會搶咗個味😍。總括嚟講，兩杯都唔錯，夠大杯，又唔會過甜，而我自己更鐘意天使呢杯👍🏻。其實茶一飲品嘅選擇超多，而我懶得揀見到易拉架有圖嘅又吸引我嘅就叫咗😂哈哈。下次再經過細心研究下先，而且價錢都唔算貴。去開炮台山一帶嘅可以前來一試哦。