麻布茶房 (已結業)

麻布茶房，我細細個就聽過呢個名喇！原來麻布茶房已經嚟到40週年，推出日式火鍋同雪糕甜品半價優惠，真係好平呀！！！所以今日同M佬嚟到九龍灣淘大商場嘅麻布茶房，試吓呢個超抵嘅火鍋set啦。壽喜燒牛肉火鍋以價論貨嚟講，真係好扺食，唔通仲期待會入口即熔咩？肉嘅份量足，牛味香濃，咁樣已經值回票價啦！除咗牛肉仲有冬菇、金菇、娃娃菜、大蔥、鳴門卷，獅子狗、龍蝦丸同豆腐等配菜，索晒壽喜燒湯汁，好好味！鐵板牛肋骨及牛舌 + 迷你海鮮丼呢個鐵板牛肋骨及牛舌，上枱支支聲，好吸引。牛仔骨同牛舌份量超多，牛香撲鼻，肉質軟腍。呢個set仲有配菜同湯，再有碗白飯，但我哋就upgrade咗做迷你海鮮丼，更加滿足。芒果聖代牛肉火鍋跟餐有芒果聖代，芒果雪糕配上大量忌廉，真係夏天嘅消暑佳品！