尚文潮州菜

营业中

休息中

朋友從英國返嚟，話好掛住食中餐，我哋就試呢間名人飯堂。 一入到去，環境有格調，雖然走中高檔路線，但餐牌上都有唔少大眾化嘅選擇。一坐底店員就送上功夫茶，即刻打開個胃。經理仲主動介紹招牌菜，又不時幫手斟茶，問下啲菜合不合口味，服務周到。 潮州粉果有驚喜！我平時唔算好鍾意食，但佢外皮好薄透，餡料豐富，有韭菜、木耳、豬肉碎等等，食落鮮美又清爽。 招牌嘅鹵水鵝片配墨魚都唔錯，鵝片肥瘦適中，肉嫩又有濃郁鵝味，帶啲鵝油香，蘸埋醬汁，層次豐富。墨魚彈牙，炸豆腐吸滿鹵水味，嫩滑可口，推介。 酥炸蝦丸金黃香脆，搭配桔柚醬汁，一甜一鮮，味道幾夾。主角~堂灼海螺盞好大塊，螺片好新鮮，配埋香橙片同芽菜，食落好爽口。勇哥傳統炒蚝爽就每枱必點，火候控制得啱啱好，蠔仔肥嘟嘟，鮮味十足，用生菜包起嚟食，一啲都唔覺膩。 呢間潮州菜既有傳統潮州菜嘅風味，又有創新嘅菜式，值得一試。