家賀屋刺身寿司專門店

有時去食日式料理店，基本都會點剌身同壽司食呢兩款為主打，咁食先至食到材料嘅鮮甜味道係最佳食法，所以有時都會去專門食刺身同壽司食肆享用，早排又去咗灣仔呢間日本刺身壽司專門店開餐。話明係主打刺身壽司，當然款式種類會較多口味選擇，首先點咗壽司吃住先，我地就點咗幾款有特大赤海蝦，汁燒海鰻，赤貝，七味燒鯖魚，安格斯牛肉，象拔蚌同油甘魚，等一陣已見壽司出來賣相精美，食材亦用料十足蓋過晒飯團，真係一口食唔晒佢，入口食到每款食材鮮嫩同鮮甜，壽司價錢亦相當大眾化，平到估你唔到嘅＄13件，超值抵食真係有驚喜。食完壽司後當然唔少得食另一主角刺身，我地一致點咗店長推介中本鮪魚腩5件，魚腩厚切肉質豐厚色澤光亮，當然拿拿聲食番件先，而魚脂平均分佈入口細嫩鮮甜，魚味極濃口感一流值回票價。除咗食到以上美食外，唔少得食番個蒲燒鰻魚丼，鰻魚食落肉質香滑啖啖肉連同飯食就最滋味！點番飲杯日本Orion生啤解吓渴入口夠涼快，再食埋其他嘢食又享受一餐美味日本美食。