軒寧樓 (已結業)

天氣凍凍地最啱食羊腩煲，咁啱喺灣仔見到呢間新開無耐嘅軒寧樓有個時令孖寶 入面有臘味糯米飯+ 驅寒羊腩煲，咁梗係即刻入去試吓先啦。臘味糯米飯：佢哋嘅糯米飯好足料，臘腸潤腸嘅份量都幾多，可以講話啖啖飯都有食到，而且佢哋飯身夠軟糯，食落又唔會成口油，唔會太膩口。驅寒羊腩煲 ：羊腩煲都幾大份，兩個人食都好夠食，入面嘅羊腩都幾多，而且佢哋嘅羊腩肥瘦均勻，煮得又夠入味，蘸埋佢哋嘅腐乳咁就仲惹味。煲入面仲有荀，枝竹，冬菇等等，仲有碟生菜添，佢哋樣樣都索哂啲湯汁，勁好味。蔥油咸鮮雞（半隻）：雞肉夠哂滑嫩，唔會太油太肥，雞本身味道夠濃，亦都煮得好入味，食得出有咸香味，蘸埋薑蔥油就更滑更好味。