Spring field (已結業)

週末放個假，想食好啲，於是同男友嚟試新野。食店位於灣仔一條橫街，尚算易找，我地去到門口，店長就已經俾定餐紙我地寫，仲解釋話清潔張檯一陣就入得嚟，唔駛乾等，抵讚！環觀四周，食店都有日式拉麵店嘅裝潢，甚至食物呈現方式都有日式嘅清緻。不過日式風格背後，賣嘅係越式河粉，碗粉仲要有燒鴨絲，亞洲幾個風格共冶一爐，成個Package都幾有趣。我點嘅粉有四款食材，牛柳粒牛肉片牛丸鴨絲，湯粉嘅香料係另上。一食落，個湯都幾清，最正係一口粉一口紫洋蔥，香氣實在係不得了。四款食材比較突出嘅係牛丸，除卻牛肉味以外仲多一層香料嘅味道，值得一試。P.S. 店長好主動招呼客人，介紹岩食嘅食材俾客人，幾欣賞呢度嘅店員。