村爺爺車仔麵 (已搬遷) 新店位置

今日陪朋友去廣華醫院覆診，覆完診就去咗附近揾食，行行下就泥咗呢個村爺爺喇~雖然，餐廳都有提供豬骨濃湯湯底，但餐廳以龍蝦湯底作主打招牌，我就梗係唔執輸，要試下啦！今日一早就出咗門口，冇咩點食到野，所以就揀咗份量比較多嘅極上（夏）特濃龍蝦湯底，除咗主打龍蝦湯底麵線，仲可以自選3種配料，同黑毛豬蘆筍卷。而我就揀咗牛肋條、牛筋、南乳炸雞翼嘅龍蝦湯底米線。餐廳唔同其他車仔麵店，冇將啲材料直接放係湯麵上，而係將配料另上，所以就唔洗擔心炸物會因為長期放係湯上而變淋。用龍蝦熬成嘅豪華湯底，味道濃郁，有海鮮嘅鮮味，可以當湯飲，米線煮至偏軟身，吸左唔少海鮮味；牛肋條份量充足，幾抵食，牛筋就好腍滑，粘稠度高，有口感，南乳雞翼就比較重味，有濃烈南乳，炸到卜卜脆。跟餐配嘅黑毛豬蘆筍卷，兩個蘆筍卷以交叉形式上碟，視覺效果都幾靚，薄薄嘅黑毛豬片包住蘆筍，再配上日式芝麻醬調味，食落就冇咁單調。