俺之沾麵專門店 (已結業)

難得有事出炮台山，見到好似有間幾好食既沾麵，其實唔知咩來頭，不過見都近地鐵站，就諗住黎試一試。因為呢間係一間小店，真係好細，得三張4人台，所以平日夜晚黎都要等位，都等左成20分鐘。呢到係專門食沾麵，其實無咩需要揀，但都要揀下以下幾樣野：1. 麵既多少2. 肥定瘦肉 （仲可以揀1-3塊）3. 筍既多少 4. 蔥既多少5. 要半熟蛋定溫泉蛋其實都唔使點諗，跟個人食量同口味啦。姐姐幫你收單個時會問你要咩湯底：原味/黑蒜/蕃茄(仲可以有辣度揀）我要左黑蒜味湯底普通份量麵、多筍、多蔥、3塊肥肉同溫泉蛋。溫泉蛋另上，有味，可以就甘食。個麵係熱上既，所以唔使驚個湯會越食越凍，湯底好濃味，唔會好咸，個蒜味唔會好重，有蒜蓉同炸蒜，唔夠炸蒜，可以自己加。肥肉都幾好肉，肥瘦適中，（朋友比左塊瘦肉我試，個人覺得太瘦，有少少乾）。個麵係粗幼適中，沾個湯岩岩好夠味。岩岩好食得曬個麵，食完個麵，仲有好多湯，可以加清湯，飲下個湯。不過，因為太油同太濃，所以都只會飲幾啖。埋單時候發現個煮麵師傅係日本人，唔怪得之都幾好味，幾特別。