一生懸麵 (荃灣千色匯I) (已結業)

旺角店排長龍，最近聽到佢地開咗新分店係荃灣，即刻要去一試啊！開咗無耐所以放工時間去食都未洗排隊住，加上係商場內地方寬敞又坐得舒服。沾麵同拉麵選擇多多，仲有供應幾款小食。今次就沾麵同拉麵都試勻佢，點咗各一款。特濃豚骨沾麵見餐牌有推薦嘅字眼，特濃豚骨湯令我超期待。湯底真係好濃厚無呃人㗎！湯底內仲有啲腍嫩嘅肉丁。幾欣賞佢地每張枱都有電子爐，沾麵湯凍咗就可以翻熱返，就重返熱燙嘅溫度。麵條粗粗地有口感，叉燒都幾厚，唔會柴。溏心蛋好嫩帶流心，荀量都幾多，爽口口感交叉下食麵唔會膩。海老拉麵櫻花蝦鋪滿面，份量無欺場，好慷慨嘅店家啊！湯底都好鮮味，加上麵條粗度適中，食落好順滑好涮嘴。小食點咗煎餃子同章魚燒，都係日式料理必點食品。煎餃子內餡滿滿，菜同肉比例平均。章魚燒醬汁好足，口感偏淋同粉，相比下更愛煎餃子啊。