亞蘇爾 (新城市廣場) (已結業)

自從早排去完澳門之後，一直對澳門嘅葡國菜念念不忘，之前每次經過呢間"亞蘇爾"，都見到好多人排隊，已經好想試，今日終於有機會了。從餐廳外面可以見到葡撻櫃，於等位期間見住新鮮焗製嘅葡撻不斷出爐，陣陣香味已經令人流晒口水。葡式辣肉腸炒雜菜 :有椰菜、珍珠筍、車厘茄及椰菜花等等，雜菜炒得爽口，唔會炒得太老，食落亦唔算多油，加入辣肉腸後，味道鹹鹹辣辣，相當開胃。葡式香蒜蕃茄芫荽煮海蜆 :上檯時散發出濃郁茄香味，入口味道酸酸甜甜，蜆肉份量算多，食落彈牙無沙，配菜有多款菇類，吸收晒蕃茄湯汁後真係非常好味。葡式香烤脆皮乳豬件配薯菜 :一份有五大件， 乳豬外皮烤得香脆唔韌，豬肉仍然保持鮮嫩多汁，雖然随碟配有辣椒醬，但個人認為唔沾醬已經好好味，薯條即叫即炸熱辣辣，伴碟有微烤過嘅翠玉瓜及菠蘿，食完肥美嘅乳豬後食返件，有助減低油膩感。焦糖葡撻 :既然係門口見到佢新鮮出爐，又點可以唔食返件呢?雖然餐廳有特式嘅濃香咖啡葡撻及鮮橙檸檬葡撻，但個人始終最喜愛平凡嘅傳統葡撻。葡撻入口香滑，外皮鬆化，新鮮出爐果然係唔同d。埋單每人二百幾蚊，但食落有澳門嘅風味，都算唔錯。