前菜叫咗雙色台灣香腸，基本上兩隻顏色味道差別不大，香腸揸到好香脆，上面嘅大量炸蒜令整道菜生色不少，冒着口臭嘅風險，都要食晒啲蒜佢
我哋冇叫到傳統嘅牛肉麵，膽粗粗叫咗一個黑蒜香油牛肉麵，結果冇令我地失望。台灣刀削麵好粗條，口感十分煙韌，好好咬口。糖心蛋蛋黃漏心，好好吃。湯底充滿黑蒜油嘅香味，值得一讚嘅係有大量炸過嘅蟲草花，出奇地同呢碗麵好配合。豆腐卜同油炸鬼炸得有啲過火，唔係好索到汁
日式鰻魚起司粟米蛋餅一上枱香氣撲鼻，蛋餅略厚，蛋餅入邊有好多芝士同粟米，口感豐富。一整條鰻魚上邊有芝士同木魚，鰻魚香甜，有少少韌。
呢度嘅招牌菜Oreo奶奶麻薯，麻薯真騰騰，好香牛奶味， 十分冰涼，木薯粉份量適中，所以食完唔會太膩
賣單四百蚊左右，價錢合理，會再黎食，值得一讚嘅係員工服務態度好好
