韓日燒 (已結業)

今日又同朋友去咗荃灣晚飯喇，平時去開荃灣，都係食打邊爐，今日突然興起，想食韓式燒烤，所以就唔打唔撞，嚟咗呢間韓日燒，價錢咁平，我哋都預咗伏伏地，點知，有驚喜喎先由飲品開始，無論係健康類別嘅五花茶、竹庶水，定係果汁汽水，甚至乎酒類，都應有盡有，我就飲咗個提子沙冰，提子味濃得來，亦夠冰凍，啱晒解渴而食物方面，種類亦有好多，原來除咗韓式燒烤之外，每張枱，都仲設有電磁爐，俾你打邊爐，湯底仲有分清湯或麻辣燙，絕對啱晒所有人嘅口味。大部份食物，水準都有返咁上下，最令人驚喜嘅係鵝腸，係燒烤爐上炒熟後，再灑上孜然粉，正而牛肉粒，亦十分嫩滑爽口，配埋海鹽食，簡直一流令人驚喜嘅係，原來除咗韓燒、打邊爐，呢度竟然仲有迴轉壽司🍣，係喎，呢度叫得做韓日燒，果然有齊韓國同埋日本嘅元素，以呢個價錢，簡直超值啦有迴轉壽司都仲未夠誇張，出面仲有大廚為大家烹調美食，而且仲會不停轉款，唔會由頭到尾都整同一種嘢食，好似我哋嗰日咁，初頭係玉子豆腐，期間仲有鹽燒秋刀魚、慢煮牛肉、同埋芝士燒帶子等等添，真係不得了呢餐我哋真係好滿意，首先價錢平，加上食物款式、種類都真係包羅萬有，再加上地方夠大，所有枱，都係以卡位嘅形式，圍住回轉壽司