食物種類有牛肉麵，魯肉飯同唔同嘅台灣小食。
我點左一杯木瓜牛乳。非常受歡迎嘅台灣特色飲品，木瓜嘅清香與牛乳嘅醇厚完美結合，清爽又滋潤。飲落會感受到果肉與牛乳搭配非常好，口感豐富，令人回味無窮，推薦！除左木瓜，仲有其他味道嘅牛乳大王同苦瓜汁大王都係幾吸引，下次再試。
我地亦試左店裏小吃之一：鹹蛋黃芋泥球。呢個外表金黃、內餡綿軟嘅小球非常誘人。鹹蛋黃嘅鹹香與芋泥嘅甜味非常搭配，咬落去香氣四溢，令人忍唔住一球接一球。
另外點左一份原條鰻魚起司玉米蛋餅。賣相吸引，店員為我地用火燒香鰻魚嘅表面，比d香氣搞到勁想即刻食，簡直係測試我耐性嘅時刻。呢個鰻魚蛋餅一咬落去比想像中更美味。蛋餅口感酥脆，鰻魚香氣濃郁，肉質香嫰，配埋芝士嘅奶香同粟米爽甜嘅口感，味道同質感都完美結合。
仲有胡麻汁涼拌苦瓜。苦瓜切成薄片，與胡麻汁拌勻，口感清爽又帶有胡麻香味，解膩又開胃。健康感亦提升，不愛吃苦瓜嘅人應該會對佢刮目相看。
最後，我地點左一份伯爵茶凍芋圓配粉粿作呢餐嘅總結。伯爵茶凍芋圓，係芋圓拌上茶味凍糕嘅特色甜品，芋圓口感軟糯，而伯爵茶味亦非常香濃，甜味調較得宜。配埋粉粿，冰冰涼涼嘅感覺令人喜愛，再加上綠豆同黑珍珠，食落甜而不膩，軟糯交融埋一齊，美味可口。
整體食物味道好，店員有禮親切，店內環境亦令人真係感受到台灣風情，下次會再黎。
1
